2Ti 4 | ATA | STEP | No iou Lataua ilou Kalisito Iesu e Anu utulusi'a ta mitema ane'i ane imamauli xe ane'i ane misoisoli no anu vaivaikala mo Anu ulivu une'e no lia 'o sou usaxila'inge, eni avikalaneni pekia'u manina aloxo 'o.

a 4:31Ti 4:1

b 4:6Pil 2:17

c 4:71Ti 6:12

d 4:81Ko 9:24-25

e 4:10-11Apo 15:37-39; 2Ko 8:23; Kol 4:14

f 4:13Apo 20:6

g 4:14Ais 59:18; Rom 2:6

h 4:19Apo 18:2; 2Ti 1:16-17

i 4:20Apo 19:22, 20:4; Rom 16:23

2 Timothy 4

1 No iou Lataua ilou Kalisito Iesu e Anu utulusi'a ta mitema ane'i ane imamauli xe ane'i ane misoisoli no anu vaivaikala mo Anu ulivu une'e no lia 'o sou usaxila'inge, eni avikalaneni pekia'u manina aloxo 'o. 2 Nini xavineni sou naa'aloxu vaikala noxou Iesu Kalisito ulai noxi'a ta mitema. Voxo se'i, la ane'i ilomuxene xe voxo se'i, la ane'i imasaxa lexe ilomuxene uasi, ia nini naxaxaisi sou naa'aloi'axu utotomu. Napela'a ta mitema sou susu noxi'a mo nakaitolone'ixu, ia naavutilixa'a lexe sou imulinu 'ili'ilixo noxou Lataua. Nini nalosi'a ta mitema lavulavu aloxo ne, la nini na'oxo se'isisi noxi'a mo la'iaxene palea uasi. 3 ^aXo ili'i, la ta mitema ilomuxu vaikala noxou Lataua uasi. Ia sangali'a uavuavuti sou ilomusou vaikala ane ane'i imasaxau, la sou ane'i i'avali'a ta mitema tavu'alo sou ilosieixu ta mitema lavulavu, sou ine'e ilosieixu vaikala ane ane'i imasaxa lexe ilomusou. 4 Ane'i ixiunu tumali'au vaikala manina noxou Lataua, ia imulinu a'alo vitavitanisi. 5 Ia eni avikalaneni pekia'u aloxo 'o la. Nini naxavutala laixe utotomu mo natulu pekia'ine mo natavule tu'utu'umaxu ane uxali noxine xe naxaxai sou naa'aloi'axu ta mitema a'alo laixe noxou Kalisito Iesu. Nini na'oxonu xaixai noxou Tila noxine, la na'oxonu maninasousi.

6 ^bXo eni ne, voxo sou soli noxilo ne a mune'e 'alai mukalu. Lexe eni asoli, la sialuxo unixi loxo uaini ulai noxou Lataua. 7 ^cEni e'oto'oto laixe no anu 'oto'oto loxo amitema sou 'oto'oto vile laixe. Mo eni eiave no anu iaveiave noxilo mukalu, loxo amitema sou aiave no anu saisale. Xe eni etetelisou muxamuxaxu taleli noxou Iesu laixe mo mune'e mutalo vaimomo 'o. 8 ^dLa sou Lataua mulalaxiinu kisivalu vile noxilo. Kisivalu ne, eni ano'u sou euli no anu saisale no voxo ane Tila ulosilo. Anu ulosilosi uasi, ulosi'a ane'i ane Lataua mumoxo'a lexe ane'i ta mitema mulapu no voxo ane Anu utulusi'a ta mitema no anu vaivaikala. No voxo ane ne, la anu ulosi'a ta mitema latala e ixomaiou Iesu manina sou ulivu une'e kalumo.

Paulo Mumasaxa Lexe Timoti Upalea Ulai Noxou

9 Eni alingai'ine lexe nini napulili sou napalea une'e noxilo. 10 ^eXo Temasi muxolu noxilo tei, ia anu mumasaxau 'ili'ilixo sou lialia 'o misevile, la sou anu mu'umesilo mo mulai ne Tesalonika. Xe Kulesikesi kalumo mulai no xalee lia tila ne Xalatia. Mo Tito kalumo mulai no xalee lia tila ne Talematia. 11 Ane'i mi'umesilo mukalu, ia nexi noxou Lukasi a taxoxolu 'o. Lexe nini nane'e noxilo, la ngingi ngongou Maluko ngane'e. Xo anu usu'ulileli no anu xaixai noxilo. 12 Eni epalusou Tukiko sou mulai no tuala ne Epeso. 13 ^fNini nane'e noxilo, la nano'u tokolomoxeni veveeni a muai no taasou Kalipo no tuala ne Toloasi. Xe nano'u lavukuxeni. Ia taneni vulusi uasi, nano'u lavuku se'i ane mi'oxonu no anu sipsip sosou kalumo.

14 ^gIa itema sou u'oxonu mimii no anu kopa, ualasou lexe Alekisanda ne, anu mulosilo tu'utu'umaxu tavu'alo misevile. Eni alingau Tila noxilo lexe anu ukolinu 'ili'ilixo ane anu mu'oxonu mune'e noxilo 'o. 15 Anu aloxo ne, la sou nini kalumo nasaxila'ine noxou. Xo anu ne, anu mutautalo ananexe no voxo ane nexi tea'aloxu a'alo laixe noxou Kalisito Iesu.

16 Xe no voxo ane ane'i mitulusilo no anu vaivaikala tei, la eni e'oxo laixesousi. Ia itema vile utulu no pa'umelo sou usu'ulileli uasi, ta menexilo mi'umesilo sou milailai mukalu. Ia eni alinga ulai noxou Lataua lexe Anu ukolinu 'ilixo e ane'i mi'oxonu mune'e noxilo ne uasi. 17 Ane'i mi'umesilo, ia Tila noxilo ne u'umesilo uasi. Anu mutulu no pa'umelo sou mulosilo xavi sou eni ea'aloxu a'alo laixe ukalusi ulai noxi'a ta mitema, mo sou ta mitema no xalexalee tuatuala ukalusi ne ilomusou. Anu Tila noxilo ne, mu'umeleli mulivunoxilo no anu tu'utu'umaxu ane ne, loxo anu mu'umeleli no anaxu mii vile ilemolu lexe laeoni. 18 La sou eni elavu manina lexe ili'i, la Tila noxilo u'umeleli no anu 'ili'ilixo masumasua e ta mitema i'oxo une'e noxilo mo ulailixo laixesi no tuala noxou teitexi no opo loxotolo. Eni alinga lexe nenge ta'itinu Tila noxinge ualasou utotomu mo ukalu uasi. Manina.

Vaikala Kaluxu

19 ^hNasova aso laixe noxilo ulai noxie Pilisila ilou mulue Akuila mo Onesipolo ilee semau ilo'a ta 'olu. 20 ⁱElasito muxolu no tuala ne Kolinito, ia Tolopimosi ne, eni e'umesou no tuala ne Mileto, xo pipiena mu'oxonu ne. 21 Eni emasaxa lexe voxo sou la'iua usoko uao, ia nini napulili sou nane'e noxilo. Uvuloi mo Puteni mo Lino ilo'a Kalautia xe ta mitema noxou Lataua tavu'alo misova aso laixe mulai noxine.

22 Eni alinga lexe Tila uxolu noxine mo alauna noxou uxolu noxinge kalumo.